പുക

പുക എന്നത് എന്റെ കൌതുകങ്ങളില്‍ ഒന്നായിരുന്നു . അതിനു കാരണം , മറ്റു പല ഉത്തരം കിട്ടാത്ത ചോദ്യം പോലെ ഇപ്പോഴും അവശേഷിക്കുന്നു .




ഒരുപക്ഷെ നമ്മളെല്ലാവരും ഒരു പുകയായി തീരുമെന്ന യാഥാര്‍ത്യത്തില്‍ നിന്നാവാം ആ കൌതുകത്തിന്റെ ജനനം . ഒരു പുകമറയായി ഞാനും അവസാനിക്കരുതെന്നു എനിക്ക് ആഗ്രഹം ഉണ്ട് ..എന്റെ ചിലതെങ്കിലും , എന്നെ കുറിച്ചുള്ള ഓര്‍മ്മകളെങ്കിലും പുകമറയില്ലാതെ ഒരു കണ്ണാടി ചില്ലില്‍ മുഖം നോക്കി കാണുന്ന എളുപ്പത്തില്‍ എല്ലാരും അറിയണം ..അതിനു ഞാനാരാ? അല്ലെ ...


അതേ ഞാന്‍ ആദ്യമായി പുക എന്ന കൌതുക വസ്തുവിനെ പരീക്ഷിക്കുന്നത് രസകരമാണ് ..
അത് നിങ്ങളില്‍ പലരും സ്വയം പരീക്ഷിച്ചിട്ടുള്ളതായിരിക്കാം.


അന്ന് ഞങ്ങള്‍ രണ്ടു പേരും കൂടിയാണ് ആ പരീക്ഷണ വസ്തുവിനെ അടുത്തറിയാന്‍ ശ്രമിച്ചത്‌ .ഞാനും എന്റെ ചേച്ചിയും .


പലരും പുക പുറപ്പെടുവിക്കുന്നത് ഞങ്ങള്‍ സ്ഥിരമായി കാണാറുണ്ടായിരുന്നു .അച്ഛന്‍ സ്ഥിരമായി പുക പുറപ്പെടുവിക്കുന്നത് ഞാന്‍ വളരെ നേരം  നോക്കിയിരുന്നു .


പലപ്പോഴും അത് ഞങ്ങളുടെ വീട്ടില്‍ ഒരു ലഹളയുടെ അന്തരീക്ഷം സൃഷ്ടിച്ചു കൊണ്ടിരുന്നു .അതൊഴിവാക്കാന്‍ പിന്നീട് അച്ഛന്‍ ഞങ്ങളറിയാതെയായി പുക പുറപ്പെടുവിക്കുക...


അങ്ങനെ കുറെ നാളത്തെ നോക്കിക്കാണലുകള്‍ക്ക് ശേഷം ഒരു അവസരം ഒത്തു വന്നു


അന്ന് ഞാനും ചേച്ചിയും മാത്രമേ ഉള്ളു വീട്ടില്‍..അപ്രതീക്ഷമായി അലമാരയുടെ മുകളില്‍ ഇരിക്കുന്നു ആ പുക പുറപ്പെടുവിക്കുന്ന കൌതുക വസ്തു .


ഞങ്ങള്‍ പരസ്പരം മുഖത്തോട് മുഖം നോക്കി..ഞങ്ങള്‍ക്ക് അങ്ങനെ ചില കാര്യങ്ങളില്‍ യാദ്രിശ്ചികമായി ടെലിപതി ഉണ്ടാവാറുണ്ട് .ഞങ്ങള്‍ ഒരു കൈനോക്കാമെന്ന് തന്നെ വിചാരിച്ചു .അങ്ങനെ അലമാരയുടെ മുകളിലത്തെ തട്ടില്‍ കണ്ട ആ ഉപകരണം ഞങ്ങള്‍ കരസ്ഥമാക്കി .പക്ഷെ ആ യന്ത്രം പ്രവര്‍ത്തിപ്പിക്കണമെങ്കില്‍ വേറൊരു സാധനത്തിന്റെ ആവശ്യകത ഉണ്ട് .അങ്ങനെ അടുക്കളയില്‍ ചെന്ന് ഞങ്ങള്‍ അതും തപ്പിയെടുത്തു.. തീപ്പെട്ടി


ആദ്യത്തെ ഊഴം ചേച്ചിയുടെതാണ് . അതാ എന്റെ കൌതുകവസ്തുവായ പുക പുറപ്പെട്ടു തുടങ്ങിയിരിക്കുന്നു .എന്റെ ചേച്ചി എന്നെ വിസ്മയിപ്പിക്കുന്ന രീതിയില്‍ മുന്‍പരിചയം ഉള്ളത് പോലെ അതാ പുക പുറപ്പെടുവിക്കുന്നു .അപ്പോള്‍ എനിക്കും അതുപോലെ പുക പുറപ്പെടുവിക്കാന്‍ കഴിയണം .ഞാന്‍ സ്വയം പറഞ്ഞു .


അങ്ങനെ ആ സിഗരറ്റ് എന്റെ കൈവശം വാങ്ങി ഞാന്‍ ഊതി തുടങ്ങി .എന്റെ പ്രതീക്ഷകള്‍ തെറ്റിപ്പോയി .അതത്ര നിസാരമായ കാര്യമല്ല .ഞാന്‍ ശ്രമിച്ചു നോക്കിയിട്ട് ഒരു തരിമ്പു പുക പോലും പുറപ്പെടുവിക്കാന്‍ എനിക്ക് കഴിയുന്നില്ല .എന്റെ ചേച്ചി “നിനക്ക് ഇത് പോലും അറിയില്ലല്ലോടി "എന്ന ഭാവത്തില്‍ അവജ്ഞയോടെ നോക്കി .ആ നോട്ടത്തില്‍ ഞാനാകെ ചെറുതായ പോലെ എനിക്ക് തോന്നി .പിന്നെ ഞാന്‍ ആ അത്ഭുതകരമായ വിദ്യ എന്റെ ചേച്ചിയില്‍ നിന്നും സ്വായത്തമാക്കി .


എന്റേത് തെറ്റിദ്ധാരണ ആയിരുന്നു .പുക അകത്തേക്ക് വലിച്ച ശേഷം ആണ് പുറത്തേക്കു വിടേണ്ടത് .ഊതുകയാണ് വേണ്ടത് എന്നത് എന്റെ തെറ്റിദ്ധാരണ ആയിരുന്നു .
അങ്ങനെ പുകയായി മാറെണ്ടുന്നതിന്റെ ആദ്യാക്ഷരം ഞങ്ങള്‍ കുറിച്ചു.